30.6.05

يمكن ايه ويمكن.....ايه!

دخل الجنرال الى اليرزة في أيار 2005 فأطل الحكيم عليه وجلسا يتكلمان وجدانيات ثم وجدانيات ثم وجدانيات
ولغة العيون وصلت من القلب الى العقل وكان الحوار التالي:

الحكيم: وهلق جنرال شو عم بيصير برا؟ خبرني من وجهة نظرك
الجنرال: ولا شي كلو كذب بكذب وانت بتعرف يا سمير انو انا ما بتحمل هيك وضع. اول ما جيت اخدوني بالاحضان وكل واحد صار بدو يشدني صوبو وبعدين صار كل واحد يجي بدو يعمل صفقة قدو. معقول؟ انتبه يا حكيم واعرف شو ناطرك
الحكيم: شي غريب؟ يعني من 11 سنة لليوم ما تغيرو؟
الجنرال: مبلى تغيرو! من سيء لأسوأ
الحكيم: انت برأيك جنرال كيف بدنا نتحالف بالاتنخابات حتى نكون نحنا طوقناهن لأن حسب كلامك عم يحاولو يطوقوك من بعد ما فركشو قانون العفو. ما بدن حدا غيرن بالبلد فلازم نحاول نبيّنلن شي والمضمون لازم يكون شي تاني شو رأيك؟

هون الجنرال تفاجأ من لعب شخصيتين بس لما قلو الحكيم: ما تخاف مش المقصود التمثيل عالناس، المقصود تمرير الانتخابات بطريقة اذكى من كل هالطبقة الحاكمة، كل تحالفاتن كذابة متلن فنحنا لازم نلعب لعبتن

الجنرال: ريحتني حكيم ومنك نستفيد! قللي انت شو رأيك؟
الحكيم: حسب يللي عم بعرفو من ستريدا انو في هجوم جنبلاطي حريري على الحكم ونحنا لازم نفرجيهم حجمنا وبنفس الوقت مش لازم زعرناتن الانتخابية تخليهن يعرفونا اننا متحالفين حتى ما يقرروا يكسحونا تنيناتنا
الجنرال: ايه والله يا حكيم هالقانون في ظلم للبنانيي وخاصة للصف المسيحي ومصلحتن كانت انو يضل قانون 2000 يللي بيضم الاقضية المسيحية للأقضية الاسلامية حتى يطلع المتحالف معن بصوت القضاء الاسلامي لأن بتبقى الأغلبية الاسلامية بهيدا القضاء
الحكيم: يعني الافضل عدم التحالف ظاهرياً حتى ناخد لنو كم مقعد بمناطقهم هني هيك بناخدن من دربن باسمنا وبعدين بنخبرن التحالف على البرنامج بالمجلس كيف بيصير

هون الغصة بقلب الجنرال وصلت لقلب الحكيم لأن القصة مندارا طائفية بس شو طالع بالايد

تنهد الجنرال وقال: يا حكيم بعدك حكيم! بس أنا ما بقدر اتحالف معن لأن انت بتعرف موقفي من قرنة شهوان اللي كل واحد منن لاهت على مقعد مع مين ما كان ومش فارقة معو تحالف
هون ضحك الحكيم وقلو: ولا يهمك جنرال محلولة بما انو ستريدا بقرنة شهوان وقريبة من البطريرك صفير وانت بتعرف انو الأفضل ستريدا تتحالف معن متل ما بيناسبنا مع شوية تنازلات لأن على لوايحن ما فينا نعمل غير هيك
قاطع الجنرال وقال: برافو حكيم لازم تحط تقلك كلو وستريدا قد الحمل لأن هيي صورة الحكيم بهالمرحلة وكرامة الحكيم كل اللي بيحبوك بينتخبوها

ومشي الحديث حسب التقسيم المناطقي بالانتخابات:

الحكيم: بالمتن وكسروان وجبيل انت عندك شعبية كبيرة، وطائقية ما راح يقدروا يلعبوها بسبب الوجود المسيحي الطاغي اذا اخدتها كلها صحتين واذا في خروقات بيكونوا النا او للكتائب وبالحالتين ربحانين
الجنرال: صح بس بباقي المناطق رح يلعبوها وسخة! بتمنى انو يكونو مرشحينكن على ليستاتهن فايزين واذا انا خرقت بنكون تنيناتنا مستفيدين واذا لعبوها بضمير.....

الجنرال قال كلمة ضمير والسخرية بينت على ملامحو
الحكيم ابتسامتو ع شفافو والدمعة بعينو وقال بحماس: يا جنرال اذا لعبوها بضمير وديموقراطية بتاخدها مش بس ببعبدا عاليه كمان بالشمال اكيد بس بدك ضمير
الجنرال: يا سمير الله كبير الن يوم خليك ع ايمانك واللي بدنا ياه بيصير
الحكيم: بس طلب كتير صغير
الجنرال وبفرح: اطلب شو بدك حكيم نحنا خرطوش فردك
الحكيم: له وَلََو! نحنا تلاميذك جنرال. بس بدي منك تحط ببعض لوايحك ممثلين عن القوات اللبنانية حتى اذا اخدت اللوائح كاملة يضل النا مطرح
الجنرال: مطرحك محفوظ حكيم وزيارة ستريدا لعندي هيي والشباب صدقني كانت شرف لالي ولما قلت انو كنت متمناك بيناتنا قلتا من كل قلبي وصدقني ما رح خليهن يعرفو ينامو كل شي وانت مش نايم ببيتك ومع عيلتك
الحكيم: الله يقويك جنرال، وطلب تاني ما تنسى البشير
الجنرال: انت ابن اصل وبيت الجميل ع الراس والعين

التفت الجنرال على الساعة وقال: اوف! ما حسينا بالوقت صار الي ساعة وانشالله يا حكيم باسرع من هالساعة رح نشوفك بيناتنا ونحنا سوا ايد بايد رح نبني لبنان ونعيشن الحبس والمنفى جواتن بيدون مسافات وقضبان
الحكيم وبلهفة: انشالله يا جنرال انشالله بقوة السما وثقتنا بالشعب اللبناني العظيم رح نعمل لبنان احلى ما كان
الجنرال:يا حكيم صار لازم فل، خلص وقت الزيارة وانشالله مرة الجايي بنزورك ببيتك

الحكيم وبفرح لأنو الامل صار موجود والفرج قريب:
"جنرال خليك بعد"

الجنرال: يا ريت بس....

غصة هالشب متل السكين بقلب هالختيار المقهور وخلّتو يتعهد على نفسو وقدام السما انو قضية الحكيم هيي قضيتو ويدبرو راسن غصب غنن بدن يفهمو انو الكرة الارضية بتبرم باتجاه واحد مش كل واحد بيبرما على ذوقو


قولكن هيك هيي القصة؟

هلق خلصت الانتخابات ورقنا وبلشنا نحلل بلا هجوميي وبلا عصبية وع رواق....

ليش ستريدا ما حكيت ولا كلمة ضد الجنرال من الاول للآخر مع انو كل اللي متحالفة معن ما خلو ولا بقو
والجنرال حكي عن وساخة الكل وحتى عن قرنة شهوان وما جاب سيرة ستريدا ولا مرة

ليش قولكن راح الجنرال عند فرنجية وراحو سوا عند كرامة، مش كرامة هوي يللي .... فهمكن كفاية عن هدف هالصلحة!

ليش سعد الحريري زار الجنرال بعد زيارتو للحكيم قولكن لاحظ شي؟

ليست هناك تعليقات: